उदय किरौला का उत्तराखंड के मित्रों के नाम पत्र

उदय किरौला का उत्तराखंड के मित्रों के नाम पत्र

शुभ स्थान – अल्माड़

जेठ, 3 पैट,वृहस्पतिवार

16 मई, 2024

सिद्धीश्री सर्वोपमा योग्यवर-6

आमा-बुबू, ठुल ईजा-ठुल बौज्यू,कका-काकी,ममा-मामी और सबै ठुलां कैं म्येरि पैला और नना कैं प्यार आशीष।

उत्तराखंड में आज भोउ हाईकोर्ट कैं ऋषिकेश लिजाणा कै क्वीड़ चलि रयीं। जाग जगां चहा दुकानों में लै लोग हाईकोर्टे कै क्वीड़ करण रयीं। हमार गौंक सभापति ज्यू कूणी कि उत्तराखंड राज के बणौ। नेता लोगों माज है रयीं। जां पैली 18 विधायक छी। वेति आब लगभग 100 नेताओं कैं रुजगार मिलि गो। गैरसैण नामै कै राजधानी छू। अल्माड़ में सहकारिता विभागौ ठुल औफिस देहरादून न्हैगो। राणिखेत में उद्यान विभागों आफिस लै नामै कै छू। आब हाईकोर्ट कैं नैनताल बटी लिजाणै तैयारी चलि रै। सुणाई में एैरै कि हाईकोर्ट कै नैनताल बै ऋषिकेश लिजाणा लिजी कोर्टा सैप लै तैयार है रयीं। मुख्यमंत्री, मंत्री और विधायक चुप छन। एक जमान में कूंछी कि प्रधानमंत्री नरसिंहा राव मौनी बाबा छू। क्ये नि बुलान। हमार यूं नेता मौनी बाबा है कम नहां। शायद कैलै इनेरि आवाज मुनि हाली। सुणाई में ऐरै कि हाईकोर्टा बार में भगतसिंह कोश्यारी ज्यूल मुख्यमंत्री ज्यू कैं चिट्ठी लेखि रै। पत्त नै यूं नेता आपुण हाईकमान है अघिल नि बढ़न या तो इनेरि बुद्धि

मारी गे।

               पहाड़ै राजधानी पहाड़ में हो य मांग करणी नेता लै आज भोउ अखबार में बयान दिबेर खुशि है रयीं। हमार सतपाल ज्यू जै दिन तक कांग्रेस में छी। पहाड़ै राजधानी पहाड़ में बनाणा लिजी बात करछी। कुमाउनी गढ़वाली कैं संविधाना आठूं अनुसूची में धरणा लिजी लोकसभा में बात धरछी। उ लै आपुण कुर्सी बचाणा चक्कर में चुप छन। जो आपुं कैं उत्तराखंड राज्य आंदोलनकारी बताण रयीं। उ आपुण पेंशन बढ़ाणा लिजी और नौकरी में आरक्षण लिजी लागि रयीं। पहाड़ै चिंता क्वे नि करण राय। आपुण नेतागिरी चमकाणा नाम पर सब अलग-अलग झंड लिबेर लागि रयीं। पहाड़ै चिंता क्वे नि करण राय।

हमार गौंक सभापति ज्यू कुणी कि देहरादून में मुख्यमंत्री और दुसार नेताओं क्ये नि चलण रयि। अफसरसाही हावी हैरै। आफीसर लोग नेता लोगों कैं उसिकै टरकै दिणीं। पैली बटी जादेत्तर सैप लोग दुसार राज्यों बटी हुंछी। आब तो ठुल ठुल आई ए एस लै येति कैं छन। क्ये करछा देहरादून बटी पहाड़ चढ़ण हूं क्वे लै तैयार नहां। हमार गौंक सभापति ज्यू कूणी कि मुख्यमंत्री ज्यू और जतू लै ठुल नेता छन। तुम सबूं कैं उत्तराखंडै आणि वालि पीढ़ी माफ नि करौ। पहाड़ा लिजी तुमेरि कुर्सी लै न्है जालि क्ये बात नै। लोग तुमन कैं याद कराल। उत्तराखंड आंदोलनकारी नाम पर जो लोग पैंशन ल्हिण रयीं। जनार ननां कैं उत्तराखंड आंदोलनकारी नाम पर नौकरी मिलि रै। भोल हूं उनेरि क्ये इज्जत होलि य सोचो। एक बार पहाड़ा विकासा नाम पर आपुणि खापड़ि खोलो। तुमेरि खापड़ि मुनि रछौ। आपुण खापड़ि खोलि बे पहाड़ै विकासै बात करो।

देश मुलूक में आज भोउ लोकसभा वोट पड़णै रयीं। उत्तराखंड में जाग जगां चहा दुकानौ में लोग हार जीत आपुण हिसाबल बताण रयीं। घरौं पन गैसा कनैक्शन वालूं कैं आपुण सत्यापन कराण छू। य लिजी गैस आफिस में लंबी लाइन लागण रै। पहाड़ पन जाग जगां बजार पन काफो बिचाण रयीं। बिहारी और नेपालि ख्वार में डाल धरि बे काफो बेचण रयीं। हमार पहाड़ा लौंड-मौंड घुटुक घाटुक लगै बे टोलि रयीं। चौखुटी गेवाड़ में मासी सोमनाथ कौथिक में लै अलबेर खूब चहल पहल है रछी। दुरहाटा नजिक जालई में बलुवाचौरा कौतिकै तैयारी लै अलबेर लोग करण रयीं। पहाड़ पन जाग जगां रामलिल चलि रयीं। बहुतै जगां स्यैणियां रामलील लै है रयीं।

            लाटि-कालि भाष कैं ल्याक लगाया। चिट्ठी ठुलि है गे कै नराज झन हया। आपुण तरफ बटी कमै लेखूल कै सोचनू। मनसुप जसै लागि जानी। कै बखतै बाटुई लागीं तो आपुं कैं याद करनू। बाटुई थामी गई तो सोचनू आपुं याद करण रछा। पहाड़ पन आब भनेर भुरभुराण कमै हैगो। जादेत्तर घरौं में गैसा चुल चलि गयीं। कुमाउनी गढ़वाली कै बचाणा लिजी आज भोउ जाग जगां बैठक चलि रयीं। बैठक दगाड़ य जरूरी छू कि हम आपुण घर में आपुण नना दगाड़ कुमाउनी- गढ़वाली में बात करूं। चिट्ठी मिलि गे कै द्वि आंखर जरूर लेखि दीया। आज भोउ सबूं कै मुबाइल में अनलिमिटेड प्लान छू। द्वि आंखर लेखि दिला तो तुमर मुबाइल घोइण जै क्ये रौ। बुड़- बाड़ि कैं मिलणै रौ कै वाल हाथ खपाड़,पाल हाथ खपाड़ नि करण चैन। च्याल ब्वारियां कैं लै बुड़-बाड़ी उज्याड़ि ध्यान दिण चैं। एक गास रूख-सुख बखत पर उनूकै खवै दिया। आपुण ज्यानै हिफाजत करिया। तबै पालना होलि। बांकि फिर लेखूल ।

तुमर मितुर ,

उदय किरौलासंपादक बालप्रहरीसचिव बालसाहित्य संस्थानदरबारीनगर अल्मोड़ा उत्तराखंडमोबाइल 9412162950वेबसाइड www.balprahri.comई मेल balprahri@gmail.com